Intervista di Tonton

Voir le sujet précédent Voir le sujet suivant Aller en bas

Intervista di Tonton

Message  Sbanditu le Mar 29 Avr - 10:36

Tonton :

“Ci vole à esse vestutu di neru è azezu sticchitu per esse un veru artistu corsu ?”



Federicu Antonpietri, cunnisciutu sott’à u cugnome di Tonton, hè un artistu attìpicu. Membru fundatore di u gruppu I Cantelli cun quale hà fattu dui dischetti, s’hè lanciatu solu in un album, intitulatu Tonton, à a culurazione folk (cun ghitarra è armonica). Ma ind’è ellu ùn ci vole à circà nè missagiu nè attu militante. Sola a vuluntà di fà belle puesie, belle musiche, è d’esce da e strade battute…


Cumu sò nati I Cantelli ? Ci pudete cuntà l’orìgine di u gruppu ?

Pensu chì ghjera in lu 94, in Corti, incu Petru Gambini è Paulu Miniconi, n’aviamu una techja di sta spressione loscia è languente di li nostri canti, tandu, avemu decisu di “boostà” ste canzone incù un’energia salvatica è umoristica… Più vicina di ciò ch’è no vuliamu sente è ch’ùn truvavamu micca ind’a pruduzzione culturale di l’epica. U gruppu hè natu cusì. Dopu, e creazione si sò imposte da per elle, vuliamu una cuesione trà a musica è e parolle, ùn ci hè statu nè calculu, nè scopu, nè missaghju, solu una vulintà di sprime a nostra visione di u cantu corsu.


Ch’ellu sia innù i vostri dui album cù I Cantelli o u vostru album « solo », avete sempre cantatu in corsu. Perchè sta scelta ? Ci vulerà à vedeci un attu militante o nò ?

Cantà in Corsu sarà sempre vistu da certe persone cum’un attu militante, colpa à a spressione “puliticu- culturale” di l’anni settanta… In fatti, scelta ùn ci n’hè stata, mancu s’hè posta a questione, aghju adupratu a lingua corsa in le mio canzone per a ragione suprana : u piacè. È d’un puntu di vista puru persunale, aghju sempre vistu u militantisimu cum’un imbutu à una vera creazione libera…


Certi vi rimpruvereghjanu chì a lingua ch’è vo aduprate innù e vostre canzone hè semplice, ch’ella manca di ricerca o ch’ella hè sfrancisata. Chì li rispundite ? Pruvucazione, vuluntà di dessacralizà a lingua ?

S’o guardu li mio rumanzi preferiti in lingua corsa, Pesciu Anguilla (di Sebastiano Dalzeto) è 51 Pegasi (di Marcu Biancarelli), chì sò, di più, à l’antipodi storichi di a literatura nustrale, mi dicu chì ciò chì m’intaressa u più ind’a scrittura hè di ghjucà incù a lingua : ritruvà a spressione pupulare di li carrughji, “creolà” u vucabulariu pè fanne un Francorsu, Americorsu o Italocorsu ; inventà parolle, mischjà verbi per fanne d’altri, scambià l’urtugraffia, etc., anch’i smileghji ! ;-) Eppò, sta lingua hè meia, nò ? Dunque facciu ciò ch’e vogliu.


E vostre canzone scambianu da ciò ch’è no eramu abituati di sente in Corsica. Parlate di sessu, di briachine, di cazzuttate, ancu di cunsanguinità, parlate di a sucetà corsa di manera umuristica ma realista. Allora falanu scutrate, ognunu n’hà pè u so contu è certi vi vedenu cum’è pruvucatori. Chì hè u vostru parè ?

Ghjè vera ch’à l’epica di li Cantelli sti sughjetti m’interessavanu (è ghjè vera, c’era dinù stu piacè di pruvucà appenna)… Ma bon, u giru hè statu prestu fattu ! Ùn aghju micca da cantà storie di studienti briachi in bisticu tutt’a mo vita… Oghje, à dilla franca, per scrive, mi n’enfuttu cumplettamente di e realità di a nostra sucetà, di e nutizie, di a pulitica, di la storia, di l’ambiente, di li prublemi suciali è di tutte ste cunnerie… Per parlà di què, ci hè Corse- Matin o Corsica sera. Ùn vogliu più guastà puesia per sughjetti cusì, a magia di a musica è di a lingua hè troppu luntana è suprana st’affari…


Avete fattu a scelta di u “pop rock nustrale”, luntanu da i gruppi più “tradiziunali”. Serà una via più difficiule ? Cumu reagisce u pùblicu ?

Ùn’avemu mai messu in oppusizione a nostra musica oghjinca è u cantu “tradiziunale”, hè solu chì à listessu tempu chè no cantavamu paghjelle o sunavamu musiche di quadrigliu, ascultavamu dinù ciò chì si facia in altrò. Aghju campatu è travagliatu in Irlanda, sunava di banjò incu un gruppu in Dublin chjamatu Grasp, u dopu meziornu feciamu musica tradiziunale Irlandese in carrughju è a sera sunavamu pop-rock elettrica ind’i pub ! Aghju pruvatu di tene sta “schisufrenia artistica” di ritornu in paese ! Per u restu, pensu chì e difficultà sò listesse per tutti i musicanti isulani, è quant’à u publicu, avemu i nostri sustenidori accaniti, ma per certi ùn femu micca “vera musica corsa”, ci hè da crede chì ci vole à esse vestutu di neru, azezu sticchitu annant’a scena, è briunà “libertà libertà” incù ritimi di ghitarra sud-americani per esse un veru artistu lucale…


Chì sguardu avete nant’à a pruduzzione musicale corsa d’oghje ?

S’assumiglia à ciò chì si passa dapartuttu, certi anu fattu a scelta d’un travagliu seriu è sinceru, creazione cuerente, ch’elle sianu ind’u stilu di a tradizione o più muderne (pensu à e pruduzzione di Paul Cesari, Altru latu, Sekli, Paul Miniconi, a Filetta, Voce ventu, Manât, è tant’altri). D’altrò, u fenomenu di l’ “home studio” ci hà arricatu dischi di merda abuminevuli, a prima closcia inc’un urdinatore pò oghje fà un discu ind’a so cucina, ùn parlu mancu di sti crooner di pizzerie chì rompenu l’arechje ancu à i pumatachji istatine sane !


Dopu à i dui dischetti di i Cantelli vi site lanciatu solu in un album (intitulatu Tonton), erate stufu di i vostri cumpagni ? Vuluntà di splurà un’antru registru musicale ?

M’ingonfienu e cuncessione, u “gruppu” in lu so sensu u più largu, mi stumaca, u “gruppu” hè surghjente di fagucitazione, di perdita d’indivitualità, di spiritu unicu, è pocu a pocu volta u cristianu in pecura… Di più, ùn vogliu micca discutà quindeci anni annant’à l’accunciamente musicale d’una di le mio canzone. Avà chì sò solu, aghju sempre ragiò, ancu s’è u risultatu hè goffu.


Chì sò avà i vostri prugetti ?

Travagliemu avà tutti i trè incù Paul Cesari è Paul Miniconi, simu dinù accumpagnati da Bruno Vidal à a batteria è Jean-Marie Gianelli à a bassa. Avemu principiatu a scena incù sta formula nova. U scopu hè di prupone un mischju di li nostri trè dischetti. Avemu datu un cuncertu in l’Aghja in Aiacciu, era una sorta di test per sta furmazione... Fermanu qualchì ditaglii à regulà... Ma da quì à pocu avemu da esse pronti per “sciappà tuttu” incù un sonu tremendu è accunciamenti musicali salvatichi... Pripargu dinù quattru tituli novi ch’anu da esce in fin’di veranu. Ci hè ancu u mio situ web www.tontonpietri.com induve aghju da mette di più soni, ritratti è videò. Un antru prughjettu hà da vede u ghjornu annant’u net, si chjamerà “CorsicaTiVi”, una parudia di a televisiò nustrale...


Ultima dumanda, chì sò i dischi è l’artisti chì sò stati impurtanti per voi ?

I primi dischi di Canta u populu Corsu (u mio preferitu Théâtre de la ville), Bob Dylan (tutti, ma sopr’à tuttu Blonde on blonde), Beatles, Rolling Stones, Isula (L’ultimu viaghju è L’anghjul’ in infernu), Serge Gainsbourg (epica pop inglesa di l’anni settanta), I Chjami Aghjalesi (Cuntrasti è ricuccate), I Mantini, L’Arcusgi, The Clash, Madness, The pogues (If I should fall from grace with god, una maraviglia…), u fondu Quilici, Oasis, Blur. Bon, hè difficiule, ci n’hè tanti…Oghje mi techju di The Babyshambles, Cocoon, è un’artista giappunesa chì si chjama Ayano Tsuji.

Intervista realizata da Petru Paulu de Casabianca

Luri capicorsu bastia gambini cesari antonpietri cantu musica musique corse corsica rock riacquistu pop

Sbanditu

Nombre de messages : 19
Date d'inscription : 20/01/2008

Voir le profil de l'utilisateur

Revenir en haut Aller en bas

Voir le sujet précédent Voir le sujet suivant Revenir en haut

- Sujets similaires

 
Permission de ce forum:
Vous ne pouvez pas répondre aux sujets dans ce forum