I Fumadori Fora !

Eccu, dapoi u primu ghjennaghju hè difesa di fumà innù i lochi publichi. Quelli ch’ùn fumanu micca sì ralegranu mentre ch’elli si strappanu i capelli l’amatori di sigarette… Ma forse seranu elli chì ci vinceranu in l’affare… Fidighjemu ciò ch’ellu s’hè passatu in Italia è in America, paesi induve u tabaccu in i lochi publichi hè pruibitu dapoi qualchì tempu.

Smirting… Sta parolla ùn vi dice nunda ? Allora cumminciate à preparavvi à ritenela. Hè semplice à spiegà. Ùn pudete più fumà in i vostri caffè, pub o discuteca preferiti ? Allora andate à accendevi una sigaretta fora, nant’à l’usciu di a porta. Ùn rimarcate nunda ? Chì mondu ! Ùn site micca solu (a) da sta terribile ripressione antitabaccu di u Statu… Chì vergogna ! Ma guardate bè in gir’à voi… A ghjente pare guasi più cuntenta ch’è nentru. È quì almenu vi pudete sente parlà, ùn ci hè micca musica troppu forte chì v’accionca. Tè ! Avà qualchissia vene à dumandavvi u focu, è principiate a discussione. Ùn rimarcate nunda ? Site purtantu in traccia di praticà u smirting !

Avete capitu avà ? Sempre micca ? Allora appena d’etimulugia, smirting hè una parolla nova chì ci vene da l’America, cuntrazzione di flirting, dragà è di smoking, fumà. Stu fenòmenu novu di sucializazione l’anu scupertu l’Americani, i primi à pruibisce a sigaretta innù i lochi publichi. Dopu hè stata l’Irlanda u primu paese auropeu à fanne altr’è tantu. Eppo’ ci hè stata l’Italia, induve tutt’ognunu pensava chì a lege ùn saria mai appiegata. Troppu indisciplinati i Taliani ? Manc’appena ! Ùn ci hè ch’è à fidighjà u mondu ch’ellu ci hè fora da i stabbilimenti à fumassine una. È ùn sò micca i latin lovers, latin losers è altri vitelloni chì s’anu da lagnà…

Da l’altra parte di u mare Tirreniu u smirting o a draga trà fumadori sbanditi da i caffè diventa un veru fenòmenu di sucetà. Ci vole à dì ch’ellu si cummencia sempre di listessa manera « ci l’avete u focu ? » o « chì fretu ! », è cusì principia a discussione. È mentre ch’elli si passanu l’affari fora, nentru i « non fumadori » s’annoianu, abbambanati da a musica è custretti à spachjà i bichjeri, vistu chì di tutte e manere, a musica troppu forte impedisce di parlà. In un’aria pura è senza fume d’accordu, ma induv’ellu ùn si passa nunda... Allora, s’anu torna da lagnà quelli chì fumanu ?

Altru puntu pusitivu. Avostra avvicinanza cù a vostra (u vostru) ex-cunquista ùn hà micca viaghjatu ? Ùn v’inchietate. Basta d’inciaccà a vostra sigaretta in terra è di dì « bon, tornu à entre chì face troppu fretu fora » d’un aria seria è grave è tuttu và bè. Venite di pigliavvi un rastellu, ma cun classa, nimu si ne dubbiteghja è ripigliate u cuntrollu di a situazione. Francamente, chì edea maravigliosa sta lege anti-tabaccu… Derebbi guasi guasi a voglia di principià à fumà…

Petru Paulu de CASABIANCA

cigarette corse corsica dehors basta stop donne omi masci surtite soirée bastia ajaccio aiacciu photos photo drague draguer fumer santé sante homme femme charme café alcool froid malade poumon cigare havane