SCB : Intervista di Carlu Orlanducci

- Site u Presidente di u Direttoriu di u Sporting ma per i Corsi, anzi tuttu, firmate quellu chì trenta anni fà hà participatu à l’epupea di u Sporting.
Carlu Orlanducci : Mi pare eri ! I ricordi sò cusì vivi. Era l’epica di Cahuzac. Tandu, l’annu nanzu à l’epupea, averiamu pussutu esse campioni. Hè contr’à Nantes chì l’arbitru ci hà fattu un culpacciu. Avemu finitu terzu è ci simu lampati in sta cuppa d’Europa…
- Parlemu sempre di u passatu. 15 anni dopu u drama di Furiani, u stadiu ùn hè ancu compiu.
CO : Hè vera ma ci demu di rimenu. Ci hè stata una riunione di nuvembre in Parigi incù Girardot, u rispunsevule di i stadii per a liga. Hà messu a cumunità d’agglumerazione in l’ubligu di travaglià. Hè esciuta a chjama d’ufferta. U 20 di dicembre anu à apre l’inviluppe è di regula, a custrazzione di a tribuna Sudu averebbe à principià di feraghju o di marzu. A custruzzione di a tribuna sudu sarebbe compia di nuvembre 2008 è l’inseme di u stadiu un annu dopu. Hè una suddisfazzione per mè. Aghju avutu à core di rilancià st’affare chì sbocca avà. Era unu di i nostri uggettivi.

-Ghjustu appuntu, qualessi sò l’uggettivi di i dirigenti oghjinchi ?
CO : Aghju accittatu di vene à u Sporting perchè Petru Paulu Antonetti m’hà spostu un prugettu è a so manera di fà. Vulemu fà sbuccà u capatoghju di u stadiu, travaglià incù rigore è prulungà a vota di u club, nurmalamente, incù i nostri mezi. Vulemu sustene a furmazione lucale tantu chì hè pussibile. Per avà, viaghja bè. A furmazione, ghjè a nostra pulitica.

- Quandu parlate di « rigore », parlate di u versu spurtivu, nant’à u terrenu, ma dinù di a gestione amministrativa. ?
CO : Iè, di rigore u club n’hà bisognu. Petru PAulu Antonetti hè u president di u direttoriu. Hè ellu chì gestisce u club. Porta a pulitica di u club è a porta bè. Hà fattu un grossu travagliu. Tene tutte e so prumesse.

- U penseru u più maiò quandu site vultatu à u SCB cuncernava u versu finanziariu.
CO : Avà, i conti sò à l’equilibriu. Eramu sempre pruibiti di ricrutà al di là di a massa salariala. Ci simu. Pudemu piglià torna unu o dui ghjucadori. Quessa vene da u travagliu di PPA.

- U ballò hà cambiatu assai sti ultimi anni. I soldi tenenu oramai una piazza tremenda. A sola via per u Sporting sarà a furmazione ?
CO : Hè Filippu Anziani, l’anzianu internaziunale chì hè incaricatu di a furmazione. Annu, trè giovani di 18 anni anu ghjucatu incù a prima squadra. Pruvemu à dà li tuttu. Dopu, tocca à elli di travaglià. In quantu à u nostru prugettu, in u Borgu, viaghja pianu pianu. Femu e fundazione di u casamentu. Hè un principiu. CI saranu quattru terreni. Ciò ch’è avemu annunziatu, u femu ! Quandu averemu toccu l’uggettivi chì c’eranu fissati, puderaghju lascià a mo piazza. U SCB ùn hè à mè. Ci sò è provu à fallu campà !
- Hè stata rimpruverata à u Sporting d’avè lasciatu parte certi giovani cum’è Modesto parechji anni fà.
CO : U Sporting hà furmatu parechji giovani di qualità. Dopu, ci sò i cuntratti. S’è u ghjucadore ne dumanda troppu in pettu à i nostri mezi, ùn lu pudemu micca tene. Quandu era ghjucadore eiu, n’aghju fattu pochi sforzi per stà in Bastia. Era una scelta. Ùn facia nunda, eru bè in Bastia.
- Cumu spiegate ch’elli si sò alluntanati i sustenitori ? Eranu 25000 à u stadiu di Francia in u 2002 è oghje chì hè oghje, ùn sò più ch’è una manata in Furiani, ancu quandu Bastia vince.
CO : Ci vole chì i ghjucadori avessinu a ghjente daretu. Anu bisognu di u publicu. Tocca à a ghjente di sapè s’è sò passiunati o nò. Quandu si ghjoca bè, piace è a ghjente chì và à vede li ghjucà. Ma avà, ci hè a televisiò. Ci hè di menu passione dinù. Quandu si paraguneghja incù l’altre squadre chì anu u publicu daretu… Hè forse ciò chì ci hà da mancà. Dipoi chì simu falati, ùn ghjunghjimu più à fà l’unione incù u publicu.
- Chì ne pensate di u cumpurtamentu di certi sustenitori ?
CO : Paghemu amende ! E cundizione sò cambiate. U sustenitore, ci vole ch’ellu venga per sustene u so club. Ma mi si pare chì certi ùn venenu à u stadiu chè per sustene à elli soli. Quandu ghjucava eiu, ci eranu e bombe agricule, i fumigeni… Hè sicura chì ci hà fattu vince parechje partite. Oghje, hè cundizione, e regule ùn sò più listesse. Hè pruibita d’accede i fumigeni ! Li hè dumandata di falla ma ùn l’accettanu micca. U sustenitore si vulerebbe sfucà ma ùn la pò più. Hè cusì.
- Si dice chì u Sporting ùn si hè micca abbastanza impegnatu ind’è u ballò in Corsica, vicinu à i giovani. U so penseru seria troppu elitista.
CO : Per contu meiu, quandu aghju lacatu u Sporting, mi sò investitu incù l’amatori di u Viscuvatu. Ma un ghjucadore prufessiunale hà un prugramma carcu. Ùn hà micca tempu. Un prufessiunale hè pigliatu da a matina à a sera. Di e volte, u mercuri, ghjunghjenu squadre à vede l’alenamentu di i prufessiunali. Certi, per esempiu, sò falati da u Niolu.
- S’avvicina u periudu di u mercatu d’inguernu. Pensà arrullà d’altri ghjucadori ?
CO : Hè una quistione di gestione. Piglieremu qualchissia solu s’ellu ci pò arricà qualcosa incù i mezi ch’è n’avemu.
- Qualessi sò i prugetti per l’avvene ?
CO : Vulemu tutti ricullà in L1. In L1, s’accresce u budget per via di i diritti TV. U scopu hè di stabilì u club. Quandu simu falati in L2, u risicu di falà in naziunale c’era. Ùn ci l’anu fatta ma simu stati pruibiti di ricrutà. Cullà in L1, sarebbe a suluzione à tutti i nostri capatoghji !
- Pensate chì l’avemu i mezi spurtivi per ricullà quistu annu in L1 ?
CO : A qualità ci hè. Ma sò pochi i ghjucadori. S’è aviamu i mezi, averiamu dinù di più pretensione. Femu assai cun pocu.
- Da quì à pocu parechje ghjucadori anu à ghjunghje à l’usciu di u so cuntrattu.
CO : Avemu digià prulungatu u cuntrattu di Casoni è di Ghisolfi. Hè PPA u rispunsevule. Face u so travagliu…